SpaceRescue (Funkšuvdnaspeallu)

SpaceRescue VISL njuolggoliŋka

Álggahit spealu

  1. Čále cealkkakoda – dahje
  2. dušše deaddil "Play".

Aktivere Java-láse ja deaddil F2-boalu du boallobeavddis.

Cealkkakoda

SpaceRescue-spealus bargat cealkkafunkšuvnnaiguin.

Don sáhtát válljet cealkkačoakkáldaga dahje dihto cealkaga, omd SMEA143. Muhto dalle it sáhte registreret iežat bohtosa. Cealkkačoakkáldagat leat: SMEA, SMEB ja SMEC.

Speallan

Cealkka boahtá oidnosii. Bahás leahkkaguolit fáktejit sániid. Ulbmil lea beastit cealkkalahtuid ja addit daidda namaid. Spealus leat golbma lávkki.

1. lávki

Don álggát viđain soahtegirdiin maid stivret njuollaboaluiguin. Don bážát leahkkaguliid lasersuotnjariin go deaddilat gaskaboalu. Báže buot leahkkaguliid mat fáktejit sániid mat gullet ovtta cealkkalahttui. Jus bážát leahkkaguoli vuostá mii ii gula dan cealkkalahttui, de buot leahkkaguolit báhčet du guvlui ja isket bilidit du girdi. Don fertet geahččalit sirdit girdi nu ahte leahkkaguolit eai deaivva du.

spacerescueimage

2. lávki

Go leat beastán ovtta cealkkalahtu, de sáddet gádjunláivvi go deaddilat R. Dus leat dušše logi gádjunláivvi. Jus sáddet gádjunláivvi ilá árrat (ovdal go leat geargan olles cealkkalahtuin), de leahkkaguolit šaddet bilidit dan.

3. lávki

Go leat gádjon cealkkalahtu, de válljet rivttes funkšuvnna (subjeavtta, verbála jnv.) - listu lea olgeš ravddas spealus. Don sirddát bajásguvlui A-boaluin, ja vulosguvlui D-boaluin. Go leat markeren rivttes funkšuvnna, de deaddilat S.

Jus lea rivttes funkšuvdna, de gádjunláivi girdila cealkkalahtuin ja bidjá dan rivttes sadjái ovttas funkšuvnnain. Cealkkalahttu ruoniha.

Jus leat válljen boasttu funkšuvnna, de leahkkaguolit fallehit du ja bilidit ovtta du ruoná galbbain. Juohke cealkkalahtus maid leat gádjon, leat guokte rukses galbba, nubbi lea dan bajábealde, nubbi fas vuolábealde. Dát máksá ahte dus leat guokte vejolašvuođa válljet rivttes funkšuvnna. Jus guktii meattát, de gádjunláivi bieđgana. Dalle dihtor čájeha dutnje rivttes funkšuvnna ja cealkkalahttu ruvssoda.

Spealu boalut ja daid doaimmat

spacerescuemeny image

  • njuolat Dáiguin sirddát soahtegirdi.
  • gaskaboallu("Space bar"): Dáinna bážát laseriin.
  • A ("Ascend"): Dáinna sirddát bajás go áiggut válljet rivttes funkšuvnna.
  • D("Descend"): Dáinna sirddát vulos go áiggut válljet rivttes funkšuvnna.
  • S("Send"): Dáinna sáddet rivttes funkšuvnna gádjunláivái.
  • R("Rescue"): Dáinna sáddet gádjunláivvi.

Čuoggát

Oaččut 10 čuoggá juohke sáni ovddas maid leat čatnan rivttes cealkkalahttui. Go olles cealkkalahttu lea biddjon oktii ja don čanat dan rivttes funkšuvdnii, de cealkkalahtu čuokkismearri duppalastojuvvo. Jus don geahččalat čatnat dasa sáni mii ii gula cealkkalahttui, de massát 5 čuoggá. Vai don duođaid beasat gillát, de leahkkaguolit vel báhčet du ala jus don dagat dan. Sirdde soahtegirdi njuolaiguin amaset leahkkaguolit deaivat du.

Ođđa cealkka

Go leat geargan, de sáhtát deaddilit R ja oažžut ođđa cealkaga. Dalle gádjunláivi doalvu válmmaš cealkaga gomuvuhtii, ja buktá dutnje ođđa.

Menylinnjá

Game-menyas sáhtát bissehit spealu jus válljet "Stop Game". Don sáhtát maid geahččat spealu bohtosiid jus válljet "Highscore". Dán funkšuvnna lea vejolaš válljet dušše ovdal go álggát speallat, ja maŋŋil.

Settings-menyas sáhtát jáddadit jiena, dahje bidjat ala jus válljet "Sound effects".

Help-menyas "Introduction" vuolde gávnnat speallanrávvagiid. Sáhtát maid válljet "Tutorial" ja de ofelastojuvvot spealu čađa. Jus válljet "About", de oaččut diehtit spealu dahkkiid nama ja e-boasta-čujuhusa.

Cealkkalahtut

Mii geavahit čuovvovaš cealkkalahtuid:

Oanádus Cealkkalahttu Ovdamearkkat
S Subjeakta Min nieiddat leat čeahpit. Bahádahkki son lea! De dáhpáhuvai, ahte rievvár bođii.
P Verbála (predikáhtor) Min nieiddat leat čeahpit. Ale mana! Don galggat jaska veallát.
Od Objeakta Bija buori dola. Maid Máret áigu oastit? Dieđát go goas mis lea čoahkkin?
A Advearbiála Lávvui gullá maid uvssot. Doai leahppi áŋgirit lohkan sámegiela olles dálvvi. Nieida lei skuvllas. Jus dieđášin, de dajašin.
HAB Habitiiva Mus leat ustibat. Min bussás leat alit čalmmit.
fC Predikatiiva Min bussás leat alit čalmmit. Gáttis ledje olbmot.
Cs Subjeaktapredikatiiva Min nieiddat leat čeahpit.
Co Objeaktapredikatiiva Son oaččui dan luoikkasin. Gáhkuid son ráhkada hui buriid.
Cp Predikatiivapredikatiiva Mus leat gieđat nu galbmasat.
CO Koordináhtor Muhto Parkera gal deavččastetne.
SUB Subordináhtor Jus dieđášin, de dajašin. Son lea viššaleabbo go mun.
PART Partihkkal Boađát go odne?
VOC Vokatiiva Gilette, boađe donge!

Mii geavahit čuovvovaš bálddalasti lahtuid:

Oanádus Bálddalasti lahttu Ovdamearkkat
CO Koordináhtor Sii ráhkadedje muohtaádjáid ja muohtaeŋgeliid.
CJT Konjuŋkta Sii ráhkadedje muohtaádjáid ja muohtaeŋgeliid.

Veahkkeneavvut ja SpaceRescue-liŋka:

Jus háliidat oahppat eambbo cealkkačoavdima birra: Cealkkalahtuid funkšuvnnat

Dahje sáhtát hárjehallat cealkkamuorain: Cealkkamuorra

SpaceRescue VISL - liŋka

Last changed: $Id: SpaceRescue_sme.xml 20008 2008-09-01 12:59:10Z biret $