Konjunkšuvnnat ja subjunkšuvnnat

Konjunkšuvnnat (= bálddalasti konjunkšuvnnat) čatnet seammalágan lađđasiid oktii:

• Piera 'ja' Lemet leaba boahtán.
• Mun oainnán sihke Piera 'ja' Lemeha.
• Mun lean sápmelaš, 'muhto' in máhte sámegiela.

Muhtun konjunkšuvnnain lea sullii seammá mearkkašupmi, muhto geavahuvvojit iešguđetlágan oktavuođain. Omd. vai, -ge, dahje. Jearaldagas geavahuvvo vai, biehttaleaddji cealkagis lasihuvvo partihkal -ge verbii. Muđuid geavahuvvo dahje.

• Mun boađán odne 'dahje' ihttin.
• Boađátgo odne 'vai' ihttin?
• In juga gáfe 'inge' deaja.
• Jugan juogo gáfe 'dahje' deaja.

Subjunkšuvnnat (= vuollálasti konjunkšuvnnat) čatnet oalgecealkagiid váldocealkagii:

• 'Jus' asttan, de boađán.
• Iŋgá dadjá 'ahte' Elle boahtá.
• Veahkehan du 'vai' gearggat.
• Veahkehan du 'vaikko' it dárbbašge veahki.
• Don borat 'dego' spiidni.
• Daga 'nugo' mun.
• Veahkehan du 'nu ahte' gearggat.

Muhtun subjunkšuvnnain sáhttet leat máŋga mearkkašumi, omd. go.

• Mun boađán 'go' asttan.
• Mun boađán 'go' lean bovdejuvvon.
• Mun lean stuorát 'go' don.

Subjunkšuvnna go sáhttá geavahit ovttas advearbbain ja adposišuvdnadajaldagain:

• Mun boađán 'ovdal go' don vuolggát.
• Mun boađán easkka 'maŋŋil go' don leat mannan.
• Vuordde 'dassážii go' mun boađán.
• Bargen leavssuid 'dan botta go' earát ođđe.
• Vuolggán 'dalle go' gávppit rahpasit.
• Lea guokte jagi 'dassái go' bohten Romsii.
• Mun boađán 'danne go/danin go /dainna go/dan dihte go/ lean bovdejuvvon.